أنوارعبدالرحمن
عندما تسأل رجلا أو امرأة كبيرين في السن، عن مصطلحات جديدة مرتبطة بالعصر الحاضر، لا يعلمان من أين جاءت أو خرجت.. فكيف تكون إجابتهما؟
يدتي.. أبي آخذ رايج أنتي ويدي، في مصطلحات بعض الأسماء، عشان أحطكم من ضمن الشريحه اللي سويت معاها لقاء، وبعطيها دكتورنا في الكلية.
شنو يعني؟
يعني بعطيكم جم مصطلح وانتو قولولي شنو معناه، يعني بسوي معاكم لقاء.
مدري يا بنيتي وش تقصدين؟.. بس قولي اللي عندج
أول شي السؤال الأول لك يا يدي، شنو معنى العولمة؟
عولمة؟.. مهي هذي العومة.. وإلا..
لا.. يا بو غانم.. اهي قاعدة اتقولك دولمه
يدتي.. انتي يعني الحين قاعدة تصلحين له يعني؟
ايه.. موب انتي قلتي جذي؟
خلاص.. بعطيكم غيرها
بس مانبي شي في السياسة، حنا مو ناقصين آخر عمرنا ياخذونا الشرطة.
انتو الحين.. ماعرفتوا العولمة عشان تعرفون اش قاعد يصير بالعالم والسياسة، حدكم أيام الغوص.. وبيوت الشعر.
ايه يا ذاك الزمان.. مب زمانكم الحين، ياليته يعود بس.
من صجك يدي.. اش نبي فيه؟.. الحمد لله اني مانولدت بذاك الزمان جان آنا طايرة بهالبخنق من فريج لفريج.. والتراب لين اركبي هههه
بلاكم ماعرفتوا قيمة ذاك الزمان.
انزين يدي السؤال الثاني سمعوه عدل وانتي بعد يدتي ترى سهل وايد، شنو الفرق بين حقوق الانسان، وحقوق الحيوان؟
ولييين.. بعد صارت جامعة الحقوق مقسمينها، للحيوان والانسان؟
واااي يدتي قاعدة اجوبتج اتضحكني تكفين لا تعلقين، أبي اسمع راي يدي.
آنا أقول مثل ما قالت جدتج أم غانم هي أبخص.
ابييييه لأ لأ.. حدكم بدعتوا.. عسى هالأجوبة بحطها للدكتور؟
سألينا سؤال سهل مانبي صعب.
شنو يعني البروتوكول؟
هااا؟.. ما نبي هالسؤال غيريه.
انزين.. شنو يعني البروستيج؟
هذا اللي يحطونه فوق الشعر، باروكة يعني.
ههههه.. تقصدين اللي يلبسها سمير غانم.
ايه.. شفتي اشلون عرفت أجاوب.
انزين يدتي انا خبري تحبين تسمعين لعبد الحليم، قولي لي اشلون مات؟
طاح بالبركة.. وصار فيه دود، وبعدها مات، واعليه عليه.
هههه.. يدتي اتصدقين وناسة لما أسمعج انتي ويدي تعطوني إجابات يديدة.
انتي سألي وحنا اللي انعرفه بنقوله.
ممم.. ما معنى التعايش السلمي؟
هاا؟ شنو؟.. جاوب يابو غانم السؤال لك.
انتي اللي جاوبي.. هي اسألتج انتي.
كح كح.. يا بنيتي كنت اعرفها بس نسيتها قربي لي المعنى يمكن اتذكر.
شوفي يدتي.. إذا قسمتي الكلمتين يطلع لج الجواب.
انا ماقدرت انطقها.. عشان اقسمها.. انتي قولي وقسميها على كيفج.
تعايش.. سلمي، يعني العيش.. بالسلم وهذا شي طيب وحلو.
عرفتوا شنو يعني؟
هااا؟.. مدري.. اقصد أي، بس بسألج هو حلو واجد وطيب؟
أكيد يا يدتي هو شي طيب وحلو، وانت يا يدي فهمت المعنى؟
خ خ خ خ
يدي.. يدي.. ابيييه نام
شي ما شفتوه:
ألو غنيمه اشلونج بنيتي؟
هلا يدتي.
يا بنيتي اختج اليوم زارتني أنا ويدج، وقالت لنا إن في عيش طيب وحلو، طبخي لنا منه.
شنو اسم العيش؟
اسمه عيش بالسلم، سألي اختج وين يبيعون السلم، وحطيه مع العيش